Este mércores, día 7 de maio, a Diocese de Ourense celebraba a festividade de San Xoán de Ávila, patrón do clero español: un día en que os sacerdotes que foron ordenados en 1958 e en 1983 celebran as súas Vodas de Ouro e as súas Vodas de Prata sacerdotais.

Ás 11:30 horas comezaba a Celebración Eucarística no Seminario Maior, presidida polo Bispo da nosa Diocese e coa participación dos sacerdotes que exercen o seu labor pastoral ó servizo da nosa Igrexa particular de Ourense. Seminaristas, familiares e amigos acompañábanos neste día tan especial para o noso clero. Na celebración, ademais de felicitar ós sacerdotes que estaban de aniversario, lembrouse a aqueles que xa non puideron estar presentes neste día e a aqueles que seguiron outro camiño ó longo das súas vidas, pero que compartiron tamén uns anos e experiencias inesquecibles no Seminario diocesano.

Sacerdotes que celebran as súas Vodas de Ouro:

D. Nicolás Afonso Domínguez	D. Francisco Freiría Alonso	D. Francisco Penín Blanco
D. Marcial Canal Canal	D. Manuel De la Fuente Velo	D. Gustavo E. Pérez Camero
D. Teófilo Conde Miranda	D. Manuel Gómez Cid	D. Joaquín Pérez Mostaza
D. Ángel Domínguez López	D. Ignacio Gómez Lois	D. Lisardo Ramos Sandiás
D. Antonio Fernández Cid	D. David González Alvarez	D. Felisindo Rodríguez Femández
D. José Manuel Fernández Rúas	D. Benito Mera Rodríguez	D. Manuel Rodríguez Seguín
D. Sergio Fidalgo Fernández	D. Rafael Nogueiras Gómez	D. Amador Vázquez Pérez
D. J. Antonio Formoso Salgado	D. Emilio Outomuro Vázquez	D. Luis Villar Casas

Sacerdotes que celebran as súas Vodas de Prata:

D. Jorge Gómez Varela	D. Francisco Pernas de Dios
D. Julio Lamelas Míguez	D. José Antonio Portela Rodríguez
D. Enedino Lorenzo Fernández	D. Camilo Salgado Vázquez

Ás 13:00 horas tivo lugar no salón de actos do Seminario Maior unha breve presentación do novo número da Revista Auriensia, para dar paso a unha conferencia a cargo do Vicesecretario para Asuntos Económicos da Conferencia Episcopal Española, D.Fernando Giménez Barriocanal, quen quixo pasar o día de San Xoán de Ávila na nosa Diocese para expoñer ós sacerdotes todo o relacionado coa nova financiación da Igrexa.

Esta visita do Vicesecretario para Asuntos Económicos da CEE nunhas datas tan sinaladas, ó nos atopar en plena Campaña da Renda, puideron aproveitala tamén os ourensáns a través dunha conferencia, pola tarde, no Centro de Desenvolvemento de Caixanova, onde Giménez Barriocanal expuxo de novo todo o relativo á financiamento da Igrexa, resolvendo as dúbidas e cuestións dos presentes.

Previamente, tivera lugar unha presentación ós medios, en que quixo destacar datos como o feito de que un de cada tres ourensáns marca a X na casiña da Igrexa ó realiza-la Declaración da Renda, un dato que nos sitúa dentro da media española e ó fronte das Diocese galegas.

A pesar deste bo dato, Barriocanal sinalaba que a Igrexa en Ourense precisaría unha maior porcentaxe para poder continuar atendendo a sacerdotes e templos, e continuar realizando a súa labor de axuda a quen máis o precisan, algo que consegue gracias ó funcionamento solidario entre Dioceses na financiación da Igrexa.