Plaza do Trigo s/n
     Tfn: +34 988 22 09 92
     32005  Ourense

     Cabido Catedral

     Miguel Ángel González García

     Laborables de 12 a 13 e de 16:30 a 19 horas
     Domingos de 16:30 a 19 horas

     Entrada individual - €.

     Grupos de 15 o máis persoas - €.

No ano 1944 comezaron os trámites para a exhibición permanente dalgunhas singulares pezas do tesouro catedralicio. A consecución dun lugar axeitado supuxo o traslado do vestiario dos capitulares e a realización de diversos accesos a outras dependencias da catedral. Os autores do proxecto foron os arquitectos Menéndez Pidal e Pons Sorolla. No ano 1954 finalizáronse as tarefas e inaugurouse o museo, situado nun ángulo de nobre arquitectura, única parte que se construíu dun claustro de finísimo gótico, a Claustra Nova, que contén diversos elementos de gran calidade, como capiteis e ménsulas, que se integran dentro da oferta artística do museo.

No ano 1992 procedeuse a unha reestruturación do museo, mellorando as instalacións, a iluminación e a seguridade. Así mesmo, incorporouse ó catálogo máis dun centenar de novas pezas.

Existe o proxecto de ampliación do museo acondicionando a capela de San Xoán, onde se recolleron tallas de aceptable calidade con este fin.

Contido:
Os fondos proceden do tesouro capitular e dos depósitos de parroquias da diocese. Dous centenares de escolleitas obras integran o catálogo. Sobresaen as seguintes:

• O chamado tesouro de san Rosendo, procedente de Celanova e constituído por unha ara portátil de pórfiro e prata, varios peites litúrxicos, cáliz, mitra e báculo de almafí, todo do século XII. Ademais do anel do Santo, anterior ó século X, e de oito pezas de cristal de rocha dun xogo de xadrez fatimí.

• O conxunto de placas de esmalte (Limoxes, século XII), que pertenceron a un frontal ou a arquetas de reliquias.

• A ourivería, riquísima, vai encabezada pola monumental Cruz preciosa de fins do século XV, a custodia procesional do Corpus do século XVII ou o relicario dos santos Rosendo e Trocado, fina obra renacentista de prata sobredourada. É interesante a colección de cálices e moi curioso o candeeiro limeño do século XVII.

• Tamén se exhiben diversos ornamentos sagrados e dúas xoias da bibliografía ourensá: o Misal Auriense de 1494 e as Constitucións Sinodais do impresor Tanco.

• O capítulo da escultura abrangue tallas pétreas e lígneas da época medieval e obras dos grandes mestres activos en Ourense desde o século XVI ó XVIII, como o chamado mestre de Sobrado, Cornelis de Holanda, Francisco de Moure, Mateo de Prado... Tamén son presenza destacada varios taboleiros do coro, obra de Juan de Angés e Diego de Solís.

• Outras obras singulares que destacan son a cruz de acibeche de fins do século XV, a arqueta de almafí italiana con escenas de Susana da mesma época que a anterior ou unha ara romana.

Tesouro de San Rosendo
(Mostra)